ကျိုက်မှော်ဝန်းရေလယ်စေတီတော်ကြီးတွင် ယခင်က ရေလယ်ဘိုးဘိုးကြီးနန်း မရှိခဲ့ပါ။ (၁၉၈၉)ခုနှစ် နဝတအစိုးရလက်ထက်တွင် ကျိုက်မှော်ဝန်းရေလယ်စေတီတော်မြတ်ကြီးအား ဂေါပက အဖွဲ့မှ ရေကာတာများပြုလုပ်ခြင်း၊ အဆောက်အဦးအသစ်များတည်ဆောက်ခြင်း၊ ဘက်စုံပြုပြင်ခြင်း လုပ်ငန်းများ ဆောင်ရွက်ရာတွင် နေ့ခင်းအချိန်လုပ်ဆောင်ပြီးစီးထားသော ဆောက်လုပ်ရေးလုပ်ငန်းများ သည် ညအခါတွင် ရေကာတာများ ပြန်လည်အက်ကွဲ၍ ပြိုကျခြင်း၊ ဆယ်ယူတင်ထားသောကုန်းတော်များ ပြန်လည်အက်ကွဲပြိုကျခြင်း၊ ဆယ်ယူတင်ထားသောကုန်းတော်များ ပြန်လည်လျောကျနေခြင်းတို့ကို မကြာခဏကြုံတွေ့ခဲ့ရပါသည်။ သက်ဆိုင်ရာပုဂ္ဂိုလ်များနှင့် သြဝါဒါဆရာတော်ဆရာကြီးများအား မေးမြန်းလျှောက်ထားရာ ရေလယ်ဘိုးဘိုးကြီးကို ပုံတော်ထုလုပ်ပူဇော်ရန် အကြံပြုကြသဖြင့် အမြင့်(၁၀) လက်မခန့်ရှိ ရုပ်ထုတော်အသေးလေးကို ဦးစွာထုလုပ်ပူဇော်ပါသည်။ ထို့ပြင်ညအခါ ရေငန်ပိုင်ဦးရှင်ကြီး၊ ရေလယ်ဘိုးဘိုးကြီး၊ နာဂမယ်တော်၊ သူရဿတီမယ်တော်တို့ ဘုရားတက်ဖူးရန်အတွက် ဘိုးတော်ဆောင် ဘေးရှိ စိန်တောင်အကာအရံအဆုံးတွင် တံခါးပေါက်ပြုလုပ်ပေးရမည်ဟု အိမ်မက်များပေးသဖြင့် ပြုလုပ် ပေးခဲ့ပါသည်။ ရုပ်ထုများ၊ တံခါးပေါက်များပြုလုပ်ပေးပြီး‌နောက် ကုန်းတော်တည်ခြင်း လုပ်ငန်းများ အဆင်ပြေအောင်မြင်ခဲ့သည့်အတွက် ‌ရေလယ်ဘိုးဘိုးကြီးရုပ်ထုအကြီးကို ထပ်မံထုလုပ် ပူဇော်ခဲ့ပါသည်။ယခုအခါ ရေလယ်ဘိုးဘိုးကြီးထံတွင် ဆုတောင်းတိုင်တည်သူများသည် လိုရာဆန္ဒပြည့်ဝကြသည် ဟု ဆိုကြသဖြင့် ရေလယ်ဘိုးဘိုးကြီးနန်းရှေ့တွင် ရပ်ဝေး၊ ရပ်နီးမှ ဘုရားဖူးများ ယုံကြည်စွာဆုတောင်း နေသူများဖြင့် စည်ကားနေတတ်ပါသည်။