လွန်ခဲ့သောနှစ်ပေါင်း(၅၀)ကျော်ကာလ၊ ပင်လယ်ဒီရေအမြင့်ဆုံးတက်ရောက်ချိန်၊ (ကျောက်တန်း မြို့ဘက်ကမ်း၊ ကမ်းနားလမ်းတစ်လျှောက် လမ်းမပေါ်သို့ ပင်လယ်ရေကျော်လွန် ဖုံးလွှမ်းချိန်)က အချို့ နေအိမ်များကြမ်းခင်းကို ရေကျော်နစ်မြှပ်ခဲ့သော်လည်း မြစ်လယ်မှ ကျိုက်မှော်ဝန်းရေလယ်စေတီတော် ၏ရင်ပြင်ထက်တွင် ရေလွှမ်းမိုးခြင်းမရှိဘဲ၊ ဝဲကတော့ထိုး၍ ချိုင့်ခွက်ကဲ့သို့ ဖြစ်နေသည်ကို မြို့နေလူအများ နှင့် ထိုစဥ်က ဘုရားဖူးရောက်ရှိနေသူများ ထူးခြားဆန်းကြယ် အံ့သြဘနန်းဖူးမြင်ခဲ့ကြရသည်မှာ ပထမ အဓိဋ္ဌာန် မပျက်မယွင်း အောင်မြင်ခြင်းပင်ဖြစ်ပါသည်။

ဒုတိယအဓိဋ္ဌာန်မှာ“လာသမျှရဟန်းရှင် လူအပေါင်း ရင်ပြင်တော်ပေါ်၌ နေလောက်စေသတည်း” ဟူ၍ဖြစ်ပါသည်။ နှစ်စဥ် နှစ်ဆန်း(၁)ရက်နေ့၊ ကဆုန်လပြည့်၊ ဝါဆိုလပြည့်၊ သီတင်းကျွတ်လပြည့်၊ တန်ဆောင်မုန်းလပြည့်အစရှိသည့် နေ့ကြီးများနှင့် ရုံးပိတ်ရက်များတွင် မြန်မာနိုင်ငံအရပ်ရပ်မှ ဘုရားဖူး များနှင့် ကမ္ဘာလှည့်ခရီးသည်များ မည်မျှပင် များပြားစည်ကားစွာ ရောက်ရှိလာစေကာမူ စေတီတော်ရှိ တန်ဆောင်း၊ ဇရပ်များနှင့် ကုန်းတော်ပေါ်တွင် လောက်ငစွာ နေထိုင်နိုင်ကြသည်ကို တွေ့ရပါသည်။

တတိယအဓိဋ္ဌာန်မှာ “ဤစေတီကိုပြုပြင်လှူဒါန်းသူသည် ပစ္စုပ္ပန်၌ပင်လျှင် လောကီစီးပွားဥစ္စာ တိုးတက်ပါစေသည်း” ကျိုက်မှော်ဝန်းရေလယ်စေတီတော်မြတ်အား ပြုပြင်မွမ်းမံလှူဒါန်းကြသူများအနေဖြင့် မိမိတို့၏ ဆုတောင်းအဓိဋ္ဌာန်ပြုချက် အောင်မြင်ပြီး၊ စီးပွားဥစ္စာရတနာများတိုးတက်လာကာ ပစ္စုပ္ပန်၌ ပင်လျှင် လက်တွေ့ အကျိုးကျေးဇူးမှာ ခံစားရသောကြောင့် ရွှေသင်္ကန်းကပ်လှူခြင်း၊ တန်ဆောင်း၊ ဇရပ်၊ မုခ်ဦးများ မွမ်းမံရန်လှူဒါန်းခြင်း၊ ရင်ပြင်တော်တည်ငြိမ်ရန် ကျောက်များချထားနိုင်ရန် အလှူငွေများ လာရောက်လှူဒါန်းကြပါသည်။

ကျိုက်မှော်ဝန်းရေလယ်စေတီတော်မြတ်အား ပြည်ထောင်စုမြန်မာနိုင်ငံတော်အစိုးရယဥ်ကျေးမှု ဝန်ကြီးဌာန၊ ဝန်ကြီးရုံး၏ (၅-၁၁-၂၀၀၉) ရက်စွဲပါအမိန့်ကြော်ငြာစာ အမှတ်(၄/၂၀၀၉) “ရန်ကုန်တိုင်းဒေသကြီး၊ ကျောက်တန်းမြို့နယ်၊ ကျိုက်မှော်ဝန်းစေတီတော်တည်ရှိရာနေရာကို ရှေးဟောင်းအထိမ်းအမှတ်အဆောက်အဦးတည်ရှိရာ ဇုန်အဖြစ်သတ်မှတ်” ပြဋ္ဌာန်းခဲ့ပြီး၊ သာသနာရေးနှင့် ယဥ်ကျေးမှုဝန်ကြီးဌာန၊ သာသနာရေးဦးစီးဌာနမှ (၁၁-၉-၂၀၁၈)ရက်စွဲပါအမှတ်၊ ၀၁/၀၁/သသန (ဦးသာ) ထွေ-၂(၁၁၇၆)ဖြင့် ထင်ရှားကျော်ကြားသည့် ဘုရားစေတီများတွင် ရန်ကုန်တိုင်းဒေသကြီးအတွင်းရှိ ဘုရားစေတီငါးဆူဖြစ်သော (၁)ရွှေတိဂုံစေတီတော်၊ (၂)ဗိုလ်တစ်ထောင်ဘုရား၊ (၃)ဆူးလေစေတီ၊ (၄)ကမ္ဘာအေးစေတီ၊ (၅)ကျိုက်မှော်ဝန်းရေလယ်စေတီဟူ၍ စေတီဘုရား(၅)ဆူတွင် ပါဝင်သော စေတီတော် ဖြစ်ပါသည်။