ဆူးလေစေတီတော် တောင်ဘက်မုခ်နှင့် ကပ်လျက်ရှိသောခန်းမတွင် ဆူးလေစေတီတော် ပြတိုက်အဖြစ် ခင်းကျင်းပြသထားသည်။ ပြတိုက်တွင် (၂၄) ပစ္စည်းအကျယ်ကို ကြေးပြားပေါ်တွင် စာလုံးဖော်ထားခြင်း၊ တိပိဋကဓရ ဓမ္မဘဏ္ဍာဂါရိက မင်းကွန်း ဆရာတော်ဘုရား၏ မေတ္တသုတ်ပွားနည်း(၁၁)နည်းအား ကြေးပြားပေါ်တွင် ပူဇော် ထားခြင်း၊ ဩဝါဒပါတိမောက် ဓမ္မစေတီကျောက်စာတော်၊ အပါယ်မှ ကင်းဝေးစေသော အဆုံးအမကို ကြေးပြားပေါ်တွင်ပူဇော်ထားခြင်း၊ မြတ်စွာဘုရားရုပ်ပွား ဆင်းတုတော် မျိုးစုံ၊ အရွယ်အစားအမျိုးမျိုး၊ မုဒြာအမျိုးမျိုး၊ သစ်သားဆင်းတု၊ ကြေးဆင်းတုတော် များပူဇော်ထားရှိပါသည်။

   ပြတိုက်နှင့်ကပ်လျက်ရှိသောအခန်းမှာ ပြခန်းဖြစ်သည်။ ထိုပြခန်းတွင် အရံစေတီမှ ထီးတော်အဟောင်းများ၊ ရတနာပုံ ပတ္တမြားဘုရား၊ မြတ်စွာဘုရား၏ဓာတ်တော်နှင့် ရဟန္တာအရှင်သူမြတ်အပေါင်းတို့၏ ဓါတ်တော်များ ကိန်းဝပ်ပူဇော်ထားရှိပါသည်။