မဟာသာသနာ့ဗိမာန်တော်ကြီးမှာ မိုးကောင်းဆုတောင်းပြည့် စေတီတော်ဝင်းကြီး၏ အရှေ့တောင်ထောင့်တွင် တည်ရှိပါသည်။ မြို့နယ်သံဃနာယက အဖွဲ့ဆရာတော်များ၊ ဌာနဆိုင်ရာများ၊ အလှူရှင်များ ဓမ္မာရုံ ဘာသာရေးအသင်းအဖွဲ့များ စုံညီစွာတက်ရောက်ကြသော အစည်းအဝေးကြီးမှ ဖွဲ့စည်းတာဝန်ပေးအပ်သော မဟာသာသနာ့ဗိမာန်တော်ကြီး တည်ဆောက်ရေး၊ ဖြစ်မြောက်ရေးနှင့် ကြီးကြပ်ရေးကော်မတီက သတ်မှတ်ထားသော မြေနေရာ၌ (၉-၃-၂၀၁၄)ရက်နေ့တွင် မြေသန့်၊ ပန္နက်တင် မင်္ဂလာအခမ်းအနားနှင့် (၈-၅-၂၀၁၄)နေ့တွင် အုတ်မြစ်တော်စီမင်္ဂလာ အခမ်းအနားများကို ကျင်းပခဲ့ပါသည်။ ဗိမာန်တော်ကြီး နှစ်ထပ်မျှ အကောင်အထည်ဖော်နိုင်စဉ်မှာပင် မြို့နယ်၏ ဘာသာရေး၊ သာသနာရေးအခမ်းအနားများနှင့် ဓမ္မာစရိယ စာမေးပွဲများ၊ ပထမပြန်စာမေးပွဲများ၊ အဘိဓမ္မာ စာမေးပွဲများ၊ သုတဓမ္မစာမေးပွဲများကို စဉ်ဆက်မပြတ် ကျင်းပလျက်ရှိပေသည်။ မြို့နယ်၏ ဘာသာရေး၊ သာသနာရေးကိစ္စရပ်များကို အထာက်အကူပြုဆောင်ရွက်နိုင်ရန်အတွက်လည်း လိုအပ်သည့်အဖွဲ့အစည်းတစ်ခု ဖြစ်သည့် မြို့နယ် ဥပတ္ထမ္ဘက အဖွဲ့ကြီးကို ဖွဲ့စည်းနိုင်ခဲ့ပါသည်။ မဟာသာသနာ့ဗိမာန်တော်ကြီးတွင်ပင် မြို့နယ်သံဃာ့နာယကရုံးခန်းနှင့် မြို့နယ် ဥပတ္ထမ္ဘက ရုံးခန်းတို့ကို ဖွင့်လှစ်ထားနိုင်ခဲ့ပါသည်။ မြို့နယ်၏ ဘာသာသာသနာရေးတို့ကို အဘက်ဘက်မှ စွမ်းဆောင်ပေးနေသည့် ဗိမာန်တော်ကြီးဖြစ်ကြောင်းကိုလည်း တင်ပြလိုက်ရပေသည်။