ယံ ကမ္မံ- အကြင်အမှုကို ကတွာ- ပြု၍ ဝါ- ပြုခြင်းကြောင့်၊ နာနုတပ္ပတိ- နောင်တတဖန်မပူပန်ရ၊ ယဿကမ္မဿ- အကြင်အမှု၏ ဝိပါကံ အကျိုးကို ပတီတော နှစ်သက်မှုပီတိနှင့် ပြည့်စုံသည်ဖြစ်၍ သုမနော- ဝမ်းမြောက်မှုဖြစ်သော မနဿနှင့် ပြည့်စုံသည်ဖြစ်၍ ပဋိသေဝတိ- ခံစားရ၏၊ ကတံ- ပြုအပ်သော၊ တဥ္စကမ္မံ- ထိုအမှုသည်ကား၊ သာဓု- ကောင်း၏၊ ကတံ- ပြုအပ် ပြုသင့် ပြုထိုက်၏။

အကြင်အမှုလုပ်ငန်းမျိုးကို ပြုလုပ်ပြီးလို့ရှိရင် ပြန်လည်စဉ်းစားတဲ့အခါ နောင်တတဖန် မပူပန်ရဘဲ အဲဒီအမှုလုပ်ငန်းရဲ့ အကျိုးကျတော့ ပတီတော – သုမနော – နှစ်သက်မှုပီတိ – ဝမ်းမြောက်မှု သောမနဿ ဝေဒနာတွေဖြင့် အဲဒီကံရဲ့ အကျိုးကို နှစ်သက်ဝမ်းမြောက် ခံစားရတယ်၊ တဥ္စကမ္မံ ကတံ သာဓု အဲဒီလုပ်ငန်းဟာ ကောင်းတယ် အဲဒီလုပ်ငန်းမျိုးကို ပြုရမည်ဟု မြတ်စွာဘုရား မိန့်ကြားတော်မူခဲ့ပါတယ်။

ဒါကြောင့် ဆုတောင်းပြည့်မယ်လမုစေတီတော် ဘဏ္ဍာတော်ထိန်းဂေါပက ဒကာများ ဝန်ထမ်းများ ဈေးသည်များကို အစထား၍ ရဟန်းရှင်လူအားလုံး ဘုရားရှင်ရဲ့ ဩဝါဒအတိုင်း ရှောင်ရမည့်တရားမှ ရှောင်ကြဉ်ကြ၍ ဆောင်ရမည့်တရားကိုလည်း လိုက်နာဆောင်ရွက်ကြပါဟု ဆရာတော်က ဩဝါဒပြုပါတယ်။