ဂန္ဓကုဋီတိုက်တော်တွင် လိုဏ်ပတ်လမ်းနှင့်အတွင်း အာရုံခံလိုဏ်ဂူတော်ပါရှိပါသည်။ ဂန္ဓကုဋီတိုက်အတွင်းသို့ ဝင်ရန် အဝင်မုခ်ပေါက်များ ၈ ပေါက်ရှိပါသည်။ အဝင်မုခ်ပေါက်များ၏ အမိုးများမှာ အခုံးပုံသဏ္ဌာန်ဖြစ်ပြီး မျက်နှာကြက် အခုံးတွင် နာမည်ကျော် ပန်းချီဆရာကြီးများ၏ ဗုဒ္ဓမြတ်စွာဘုရားက မေတ္တာဓာတ်ဖြင့် အောင်မြင်တော်မူခဲ့သည့် အောင်ခြင်းရှစ်ပါး ဆေးရေးပန်းချီပုံများကို ရေးဆွဲထားသည်။ (က) တောင်ဘက်အဝင်မုခ်ပေါက်တွင် “မာရ်နတ်ကိုအောင်မြင်တော်မူခြင်း” (ခ) အနောက်တောင်ထောင့်အဝင်မုခ်ပေါက်တွင် “အာဠာဝကဘီလူးကို အောင်မြင် တော်မူခြင်း” (ဂ) အနောက်ဘက်အဝင်မုခ်ပေါက်တွင် “နာဠာဂီရိဆင်ကို အောင်မြင်တော်မူခြင်း” (ဃ) အနောက်မြောက်ထောင့်အဝင်မုခ်ပေါက်တွင် “အင်္ဂုလိမာလကို အောင်မြင် တော်မူခြင်း” (င) မြောက်ဘက်အဝင်မုခ်ပေါက်တွင် “စိဉ္စမာဏကို အောင်မြင်တော်မူခြင်း” (စ) အရှေ့မြောက်ထောင့်အဝင်မုခ်ပေါက်တွင် “သစ္စကပရိဗိုဇ်ကို အောင်မြင် တော်မူခြင်း” (ဆ) အရှေ့ဘက်အဝင်မုခ်ပေါက်တွင် “နန္ဒောပနန္ဒနဂါးမင်းကို အောင်မြင်တော် မူခြင်း” (ဇ) အရှေ့တောင်ထောင့်အဝင်မုခ်ပေါက်တွင် “ဗကဗြဟ္မာကြီးကို အောင်မြင်တော် မူခြင်း” စေတီတော်ကြီး၏ အတွင်းအာရုံခံလိုဏ်ဂူ ပတ်လမ်းသည် ၁၃ ပေခွဲ အကျယ်ရှိသည်။ လိုဏ်ပတ်လမ်းကို လက်ယာရစ်ပတ်မည်ဆိုပါက လက်ဝဲဘက်ရှိ အဝင်မုခ်ပေါက်တစ်ခုနှင့် တစ်ခုကြားတွင် ပြခန်းတစ်ခုစီဖြင့် ပြခန်း ၈ ခန်းရှိပါသည်။ အဆိုပါ ပြခန်းများတွင် မြတ်စွာ ဘုရားထင်ရှားရှိစဉ်က ဗျာဒိတ်တော်ပေးခဲ့သည့်နေရာများမှ စေတီပုထိုးများ၊ ပျူခေတ်မှ ရတနာပုံခေတ်ထိ စေတီပုထိုးများ၊ ရုပ်ပွားဆင်းတုတော်များနှင့် တိုင်းရင်းသားများ နေထိုင်ရာ ပြည်နယ်များမှ တန်ခိုးကြီးသော စေတီပုထိုးတော်များနှင့် ရုပ်ပွားဆင်းတုတော်များကို ပုံတူငယ် များဖြင့် ပြသထားပါသည်။