ရင်ပြင်တော်               

  စေတီတော်ကြီး၏ ရင်ပြင်တော်မှာ အနားလေးဘက်ညီစတုရန်းပုံသဏ္ဌာန်ဖြစ်၍ အနားတစ်ဘက်လျှင် ၂၉၇ ပေ ရှိသည်။ ရင်ပြင်တော်ကို အမြင့် ၄ ပေ ၆လက်မရှိ မဟာရံ တံတိုင်းတို့ဖြင့် အခိုင်အမာကာရံထားကာ တံတိုင်းတွင် စိန်တောင်များတပ်ဆင်ထားသည်။ ရင်ပြင်တော်အတွင်းသို့ဝင်ရန် အရှေ့၊ တောင်၊ အနောက်နှင့် မြောက်အရပ် လေးမျက်နှာတွင် အဝင်မုခ်ဦးပြာသာဒ်တစ်ဆောင်စီတည်ဆောက်ထားပါသည်။ ရင်ပြင်တော်၏ ထောင့် ၄ ထောင့် တွင်လည်း တစ်ထောင့်လျှင် ပြာသာဒ်တစ်ဆောင်နှင့် တံခွန်တိုင်တစ်ခုစီတည်ဆောက်ထားသည်။ မုခ်ဦးပြာသာဒ် ၄ ဆောင်နှင့် ထောင့်ပြာသာဒ် ၄ ဆောင်တို့တွင် ဘုရားဖူးပြည်သူများ စိတ်ချမ်းသာစွာ အနားယူနိုင်ကြသည်။ ရင်ပြင်တော်အပြည့် နေပူခံစကျင်ကျောက်ပြားများ ခင်းကျင်းထားသည်။ အရှေ့မြောက်ထောင့်ပြာသာဒ်တွင် ကြေးခေါင်းလောင်းကြီး တစ်လုံးနှင့် အနောက်တောင်ထောင့် ပြာသာဒ်တွင် ထိုးစည်ကြီးတစ်ခုရှိသည်။ ထို့ပြင် ရင်ပြင်တော် အတွင်းတွင် ကြေးခေါင်းလောင်းအလတ် ၅ လုံးရှိသည်။ အနောက်မြောက်ထောင့် ပြာသာဒ်တွင် ခြေတော်ရာပါဒစေတီတော်နှင့် မတ်ရပ်တော် ရုပ်ပွားတော်ရှိသည်။