၂ဝဝဝ-၂ဝဝ၁ ခုနှစ်၊ ဆဋ္ဌမအကြိမ်ရွှေသင်္ကန်းကပ်လှူပူဇော်ရာတွင် ထီးတော်ကြီး၏ ကျားလက်သည်းအောက်မှ ခေါင်းလောင်းတော်နှုတ်ခမ်းအထိ မျက်ပါးရွှေရာဆိုင်း ၇၁၅၆-ဆိုင်းဖြင့် ရွှေသင်္ကန်း ကပ်လှူပူဇော်ခဲ့သည်။ ငှက်ပျောဖူးတော်တွင် ကပ်လှူထားသော ရွှေစင်ရွှေပြား ၃၀၅-ချပ်အနက် ချို့ယွင်း၍ မွမ်းမံရန် လိုအပ်သော ၂-ကျပ်သားရွှေပြား ၇၉-ချပ်တို့ကို ဖြုတ်ယူ၍ မွမ်းမံရောင်တော်ဖွင့်ပြီး ပြန်လည်ကပ်လှူ ပူဇော်ခဲ့သည်။ ထီးတော်ကြီး၏ ကြံ့ခိုင်မှုအခြေအနေ၊ ထီးတော်တွင် တပ်ဆင်ပူဇော်ထားသော ရွှေခေါင်းလောင်း၊ ငွေခေါင်းလောင်းများ၏ အခြေအနေတို့ကို စစ်ဆေးခြင်း၊ ရွှေခေါင်းလောင်း ၉-လုံးနှင့် ထိုးတန်၊ ငွေခေါင်းလောင်း ၁၂၄-လုံးတို့အား ရောင်တော်ဖွင့်၍ ပြန်လည်ချိတ်ဆွဲခြင်း၊ စိန်ဖူးတော်နှင့် ငှက်မြတ်နားတော်တို့တွင် ချို့ယွင်းနေသော ရတနာပစ္စည်း ၁၈-ခုအား မွမ်းမံ၍ ပြန်လည် တပ်ဆင်ပူဇော်ခြင်း၊ အရံစေတီတော် ၂၄-ဆူတွင် လိုအပ်သော နေရာများ၌ မျက်ပါးရွှေ ရာဆိုင်း(၁ဝဝ)ဖြင့် ပြန်လည်မွမ်းမံ ကပ်လှူပူဇော်ခြင်းတို့လည်း တစ်ပါတည်းဆောင်ရွက်သည်။ ၁၃၊ ၁၁၊ ၂၀၀၀ ရက်နေ့တွင် စတင်ဆောင်ရွက်၍ ၂၄၊ ၁၊ ၂ဝဝ၁ ရက်နေ့တွင် ပြီးစီးသည်။ လှူဒါန်းမှုတန်ဖိုးငွေမှာ ကျပ် ၂၅,၃၅၃,၂၄၄.ဝဝ ဖြစ်သည်။

၂၀၀၄-၂၀၀၅ ခုနှစ် ပွင့်လင်းရာသီတွင် သတ္တမအကြိမ်ရွှေသင်္ကန်းကပ်လှူရာတွင် ထီးတော်ကြီး ကျားလက်သည်းအောက်မှစ၍ ပစ္စယာအောက်ဆုံးအဆင့်အထိ အရံစေတီငယ် ၂၄-ဆူ အပါအဝင် လုံးတော်ပြည့် ရွှေသင်္ကန်းကပ်လှူပူဇော်ရန် ရည်မှန်းခဲ့သည်။ သို့ရာတွင် ကမ္ဘာ့ဗုဒ္ဓဘာသာထိပ်သီးညီလာခံကျင်းပချိန်နှင့် ကြုံကြိုက်နေ၍ ရွှေသင်္ကန်းကပ်လှူရန် အချိန်ကာလကန့်သတ်ချက်ကြောင့် ရာသီဥတုသင့်မြတ်ချိန်တွင် လုံးတော်ပြည့်ရွှေသင်္ကန်းကပ်လှူရန် ဖြစ်နိုင်ခြေမရှိသဖြင့် စေတီတော်ကြီးအထက်ပိုင်းဖြစ်သည့် ထီးတော်ကြီး ကျားလက်သည်း အောက်မှ ခေါင်းလောင်းတော်နှုတ်ခမ်းအထိအပိုင်းကိုသာ သတ္တမအကြိမ်ရွှေသင်္ကန်းကပ်လှူ ပူဇော်ခြင်းအဖြစ် သတ်မှတ်ဆောင်ရွက်သည်။

သတ္တမအကြိမ် ရွှေသင်္ကန်းကပ်လှူရာတွင် ဂေါပကအဖွဲ့ရုံးလက်ဝယ်ရှိ မျက်ပါးရွှေရာဆိုင်း ၁၅၃-ဆိုင်း၊ ရွှေစင်ချောင်း၊ ရွှေစင်အပိုင်းအစ ၄၃ိ၊ ၅ဲ၊ ၆ရွေး၊ ရွှေစင်ရွှေပြားသင်္ကန်း အပိုင်းအစ ၁၇ိ၊ ၇ဲ၊ ၃ ၁/၂ ရွှေးနှင့် သစ်စေး ၃၇-ပုံး (ကာလပေါက်ဈေးအရ ကျပ် ၁၅၄-သိန်းခန့်) လက်ဝယ်ရှိ ရွှေစင်ပြား ၄-ချပ်တို့ကို ထုတ်သုံး သည့်အပြင် မျက်ပါးရွှေရာဆိုင်း ၆၅ဝဝ-ဆိုင်းအပါအဝင် ကျပ် ၅၇၇- သိန်းကျော်ဖိုးရှိ ပစ္စည်းများကိုလည်း ဝယ်ယူအသုံးပြုခဲ့သည်။ ငြမ်းထိုး၊ ငြမ်းဖျက်၊ သစ်စေးထုတ်၊ ရွှေချလုပ်ငန်း လုပ်အားခအပါအဝင် ရွှေသင်္ကန်း ကပ်လှူပူဇော်ခြင်းလုပ်ငန်းအတွက် တန်ဖိုးငွေပေါင်း ကျပ် ၇၇၅ သိန်းကျော်လှူဒါန်းခဲ့သည်။ ယခုအကြိမ်တွင် မျက်ပါးရွှေကပ်လှူခြင်းအပြင် ရွှေစင်ပြားသင်္ကန်း ၂၂-ပြားကိုပါ ကပ်လှူခဲ့သည်။ လုပ်ငန်းကို ၁၇၊ ၁၂၊ ၂ဝဝ၄ ရက်နေ့မှ ၃၊ ၄၊ ၂ဝဝ၅ ရက်နေ့အထိ ကာလအတွင်း ဆောင်ရွက်ပြီးစီးသည်။

ယခုအကြိမ်တွင်လည်း ဂေါပကအဖွဲ့သည် အခါအခွင့်ကြုံခိုက် ထီးတော်ကြီး၊ ငှက်မြတ်နားတော်၊ စိန်ဖူးတော်နှင့် ရတနာစီခြယ်ထားသော ကလပ်ပန်းပြားများကို မှတ်တမ်းဓာတ်ပုံရိုက်ခြင်း၊ ကြံ့ခိုင်မှုစစ်ဆေးခြင်း၊ ပြုတ်ထွက်နေသော ရတနာပစ္စည်းများကို ဖြည့်စွက်တပ်ဆင်ခြင်းနှင့် အသေးစားပြုပြင်မွမ်းမံမှုများ ပြုလုပ်ခြင်းတို့ကို ဆောင်ရွက်သည်။

၂ဝဝ၅-၂၀ဝ၆ ခုနှစ် ပွင့်လင်းရာသီတွင် အဋ္ဌမအကြိမ်ရွှေသင်္ကန်းကပ်လှူပူဇော်ခြင်းကို စေတီတော်ကြီး၏ ခေါင်းလောင်းတော်နှုတ်ခမ်းမှ အောက်ဆုံးပစ္စယာအဆင့် (အရံစေတီငယ် ၂၄-ဆူ အပါအဝင်)အထိ ဆက်လက်ကပ်လှူပူဇော်သည်။ ၂ လက်မပတ်လည် မျက်ပါးရွှေရာဆိုင်း ၉ဝဝဝ-ဆိုင်း (တန်ဖိုးကျပ် ၁၄ဝဝ သိန်း)၊ သစ်ဆေး ၉၀-ပုံး (တန်ဖိုးကျပ် ၅,၆၃၅,၀၀၀.၀၀)၊ အခြားရွှေချလုပ်ငန်းသုံးပစ္စည်းများ (တန်ဖိုးကျပ် ၁,၂၂၄,၃၆ဝ-ဝ၀) ဝယ်ယူမှုကုန်ကျစရိတ်နှင့် ငြမ်းထိုး၊ ငြမ်းဖျက်နှင့် ရွှေချလုပ်အားခအပါအဝင် စုစုပေါင်းကျပ် ၁၅၂၄- သိန်းကျော်ဖိုး လှူဒါန်းပူဇော်သည်။

အဋ္ဌမအကြိမ် ရွှေသင်္ကန်းကပ်လှူရာတွင် ထူးခြားချက်တစ်ခုမှာ အရံစေတီငယ် ၂၄-ဆူ အနက် စေတနာရှင်မိသားစု ၈-စုက တစ်ဆူစီ၊ စေတနာရှင်မိသားစု ၁-စုက ၃ဆူ၊ ပေါင်း ၁၁- ဆူ ရွှေသင်္ကန်းကပ်လှူ ပူဇော်ရန် ပါဝင်လှူဒါန်းခဲ့ခြင်းဖြစ်သည်။ ရွှေသင်္ကန်းကပ်လှူ ပူဇော်ခြင်းလုပ်ငန်းကို ၂၅-၁၀-၂၀၀၅ ရက်နေ့မှ ၉-၁-၂၀၀၆ ရက်နေ့ထိ ကာလအတွင်း ဆောင်ရွက်ပြီးစီးသည်။

၂၀၀၆-၂ဝဝ၇ ခုနှစ် ပွင့်လင်းရာသီတွင် နဝမအကြိမ်ရွှေသင်္ကန်းကပ်လှူပူဇော်ခြင်းကို ဆောင်ရွက်ရာ၌ စေတီတော်ကြီးအား ရွှေသင်္ကန်းကပ်လှူပူဇော်ခြင်းမဟုတ်ဘဲ စေတီတော်ကြီး၏ ထီးတော်ကြီးကို ရွှေသင်္ကန်းကပ်လှူခြင်းဖြစ်သည်။ သတ္တမအကြိမ် စေတီတော်ကြီး၏ အထက်ပိုင်း၊ အဋ္ဌမအကြိမ်စေတီတော်ကြီး၏ အောက်ပိုင်းတို့ကို တစ်ဆက်တည်းဆက်လက် ဆောင်ရွက်ပြီးစီးခဲ့ရာ ရွှေသင်္ကန်းအခြေအနေမှာ ၂၀၁၀ ခုနှစ်၊ ပွင့်လင်းရာသီခန့်မှသာ ထပ်မံ ရွှေသင်္ကန်းကပ်လှူပူဇော်ရန် လိုအပ်မည့်အနေအထားရှိသည်။ သို့ရာတွင် စေတီတော်ကြီး၏ ထီးတော်ကြီးမှာ ရောင်တော်ဖွင့်ရန် လိုအပ်ကြောင်းစစ်ဆေးတွေ့ရှိချက်အရ ထီးတော်ကြီးကို မျက်ပါးရွှေသင်္ကန်းကပ်လှူရောင်တော်ဖွင့်ခြင်းဖြစ်သည်။ ထီးတော်ကြီးအနေဖြင့် ယခုအကြိမ်မှာ တတိယအကြိမ်ဖြစ်သော်လည်း စေတီတော်ကြီး၏ ရွှေသင်္ကန်းကပ်လှူခြင်းလုပ်ငန်းအဖြစ် နဝမအကြိမ်ဟု သတ်မှတ်ခြင်းဖြစ်သည်။

ရွှေချလုပ်ငန်းတွင် ၂ လက်မပတ်လည် မျက်ပါးရွှေရာဆိုင်း ၃၅ဝ-ဆိုင်း (တန်ဖိုးကျပ် ၇၀-သိန်း) ရွှေချ၊ ငြမ်းထိုး၊ ငြမ်းဆင်လုပ်ငန်း လုပ်အားခအပါအဝင် စုစုပေါင်းကျပ် ၈,၈၆၀,ဝဝဝ.ဝဝ တန်ဖိုးလှူဒါန်းခဲ့ သည်။ အထူးသတိပြုအလေးထားဆောင်ရွက်ရန်လိုအပ်သည့်အချက်မှာ ထီးတော်ကြီး၏ အထက်ကပ်လျက် တပ်ဆင်ပူဇော်ထားသော ငှက်မြတ်နားတော်၊ စိန်ဖူးတော်၊ ကလပ်ပန်းပြားတွင် စီခြယ်တပ်ဆင်ထားသည့် အဖိုးတန်ရတနာပစ္စည်းများ၏ လုံခြုံရေးဖြစ်သည့်အတိုင်း ဂေါပက အဖွဲ့သည် ထီးတော်ကြီးအား ရွှေသင်္ကန်းကပ်ကြသည့်ကျွမ်းကျင်လုပ်သားများကို လုံခြုံရေးအဖွဲ့ဖြင့် စနစ်တကျ အချိန်ပြည့်အလေးထားစောင့်ကြပ် ကြပ်မတ်ခဲ့သည်။