သက္ကရာဇ် ၉၇၂ ခုနှစ်တွင် မဟာဓမ္မရာဇာဘွဲ့ခံအနောက်ဘက်လွန်မင်းက တောင်ငူမြို့ကိုလုပ်ကြံတိုက်ခိုက်ပြီး၊ “တောင်ငူသားတို့ကိုသစ္စာတော်ပေးစေ၊ထီးနန်းကိုမှန်ကင်းချ၍ မြို့ကိုအပ်ချေ” ဟုအမိန့်တော်စေခဲ့ရာ နတ်သျှင်နောင်မင်းသည် အနောက်ဘက်လွန်မင်း လက်အောက်ကျရောက်ခဲ့ရပါသည်။ နတ်သျှင်နောင်သည် သန်လျင်ဘုရင်ခံ ဒီဘရိတိုခေါ် ငဇင်ကာနှင့်မဟာမိတ်ပြုပြီးဖြစ်သဖြင့် ၊ သန်လျင်နှင့်ဆက်သွယ်ကာ ငဇင်ကာကိုခေါ်စေခဲ့ရာ၊ ပေါ်တူဂီတပ် တောင်ငူသို့ချီတက်လာပြီး၊ တောင်ငူနန်းတော်ကိုမီးတိုက်၊ ကျောင်းကန်အိပ်ယာများကို မီးရှို့ဖျက်ဆီး၊ ဆင်မြင်း ၊ ရွှေငွေများနှင့် နတ်သျှင်နောင်ကိုခေါ်ယူကာ သန်လျင်သို့ ပြန်ခဲ့ပါသည်။ အနောက်ဖက်လွန်မင်းသိရှိပြီး ၉၇၄ ခုနှစ်၊ ပြာသိုလဆန်း (၄)ရက်နေ့ညတွင် သန်လျင်ကိုစတင်ချီတက်၊ တပေါင်းလဆန်း(၂) ရက်နေ့တွင် ကျိုက်ခေါက်စေတီကို ဖူးမြော်၊ မကိုဋ်တော်ကို ငှက်ပျောဖူးထိပ်မှာတပ်လှူပြီး ‘သာသနာဖျက် ငဇင်ကာကို အောင်နိုင်ရပါလို၏’ ဆုတောင်းခဲ့ရာ၊ ၃၆ရက်မြောက်၊ ၉၇၅ခုနှစ်တန်ခူးလဆန်း (၈)ရက် ဗုဒ္ဓဟူးနေ့တွင် ဆုတောင်ပြည့်အောင်မြင်ခဲ့သည့် သမိုင်းဝင်အထင်ကရထူးခြားသည့်အောင်မြေပင်ဖြစ်ပါသည်။