ဗုဒ္ဓမြတ်စွာ၏ ဆံတော်၊ဓာတ်တော်များအား ဘယ်သို့သော အရပ်တွင် ဌာပနာပြု၍ ဓာတုစေတီ တည်ရသော် အဓွန့်ရှည်မည်နည်းဟု သီဟဒီပမင်းက ရဟန္တာမြတ်တို့အား မေးမြန်းလျှောက်ထား၏။ ထိုအခါ ရဟန္တာအရှင်မြတ်တို့က ဘုရားရှင်၏ ဗျာဒိတ်တော်နှင့်အညီ ဗုဒ္ဓ၏ပရိဘောဂ ဓာတ်တော် ဆံတော်မြတ်များ ကိန်းဝပ်စံပါယ်တော်မူရာ ရွှေတိဂုံစေတီတော်တည်ရှိသည့် မဟာသိင်္ဂုတ္တရ ကုန်းတော်၏ အရှေ့မြောက်စွန်းတာ (၁၅၀၀)အကွာ၌ တည်ရှိသော  ပထမပတိကုန်းမြေ၌ စေတီ တည်ထားကိုးကွယ်ရန် ညွှန်ပြ၏။ပထမ ပတိကုန်းမြေ ဆိုသည်မှာ ဘုရားအလောင်းတော် ဟင်္သာမင်း ဖြစ်စဉ်ကာလက သမုဒ္ဒရာသို့ ပျံသန်းရာ လေပြင်းမုန်တိုင်းကြောင့် ရေသို့ကျခဲ့၏။ အလောင်းတော် ဟင်္သာမင်းရေထဲကျနေရာ၌ ပေါ်ထွန်းလာသည့် ပထမပတိကကုန်းမြေဖြစ်၏ဟု ကျမ်းကပြဆို၏။ ရဟန္တာအရှင်မြတ်တို့က ရေမြေရှင်မင်းမြတ် ဤပထမပတိကကုန်းမြေ၌ ဘုရားရှင် ဆံတော်၊ ဓာတ်တော် မြတ်အား ဌာပနာလျှက် တြိယ၀ဝင်္ဂမင်း၊ သိကြားမင်းနှင့် ရသေ့ဂေါက်တို့မှ စေတီတစ်ဆူဦးစွာ တည်ထားခဲ့ဘူး၏။ ပထမစေတီတည်ခဲ့ဘူးသဖြင့် ယခုအခါ ဒုတိယအကြိမ် တည်ထားရခြင်း ဖြစ်သည်ဟု မိန့်ကြားလျှင် သီဟဒီပမင်းသည် ကျေနပ်ဝမ်းမြောက်ခံစားခဲ့ရ၏။ 

          ပထမပတိတကုန်းတော်သို့ရောက်လျှင် ဆံတော် နှင့်အတူ ဓာတ်တော်များအား ခုနှစ်ရက်တိုင်တိုင် ပူဇော်ပွဲသဘင်ဆင်ယင် ကျင်းပခဲ့၏။ ထို့အတူ ထိုနှစ် တပို့တွဲလပြည့် မင်္ဂလာအခါတော်နေ့၌ ရွှေအုတ်၊ ငွေအုတ်၊ ပတ္တမြားအုတ် စသည့် ရတနာ အုတ်ကျောက် များ ဆောက်လုပ် အပ်သည့် ဂန္ဓာကုဋီ တိုက်တော်ဝယ် ဆံတော်(၆)ဆူ၊ ဓာတ်တော်(၁၀)ဆူတို့အား ၊ ရွှေကြုတ်၊ငွေကြုတ်၊ပတ္တမြား ကြုတ်စသည့် ကြုတ်(၇)ထပ်စီတန်းလျှက်ဌာပနာပြုတော်မူခဲ့၏။ ယင်းကဲ့သို့ ပင် ရဟန္တာ အရှင်မြတ်တို့ ရှိခိုးပူဇော်ဟန် ရုပ်ထုအားလည်းကောင်း သီဟဒီပမင်းကြီးမှ ပူဇော်နေဟန် ရုပ်ထုတော်ကို လည်းကောင်း ရွှေအတိဖြင့် သွန်းလောင်းလျက် ဌာပနာတိုက်အတွင်းသို့ သွင်းလျှက် စေတီတော်ကြီးအား တည်ထား ကိုးကွယ်တော် မူခဲ့၏။ 

          ကျိုက္ကဆံစေတီတော်နှင့် ရှင်ယသသိမ်တော်အား တည်ထားသမုတ်တော်မူပြီးနောက် ရဟန္တာ(၈)ပါး၏ ဦးစီးခေါင်းဆောင် ရှင်ယသမထေရ်မြတ် ပရိနိဗ္ဗာန်စံတော်မူခဲ့၏။ ရဟန္တာအရှင်မြတ်၏ ရုပ်အလောင်းအား ခမ်းနားကြီးကျယ်စွာ ပူဇော်သဂြိုဟ်မှုပြုခဲ့၏။ ရှင်ယသ၏ အရိုးဓာတ်တော်အား ဌာပနာ၍စေတီ တည်ထားကိုးကွယ်ရာ ရှင်ယသဓာတုစေတီဟုတွင်၏။ ရှင်ယသဓာတုစေတီမှာ သမိုင်းဝင်ကျိုက္ကစံ စေတီ တော်၏ အနောက်တောင်ဘက် ပေ(၃၀၀)နီးပါးခန့်အကွာ၌ တည်ရှိနေ၏။ ထိုစေတီသည် ယနေ့တိုင် “ကျိုက္ကစံ စေတီ”ဟူ၍ ထင်ရှား၏။ ကျိုက္ကစံစေတီတော်တည်ခြင်း ပြုပြင်ခြင်း လုပ်ငန်းများ ဆောင်ရွက်ခဲ့ပါသည်။ 

၁။ပထမအကြိမ် – မဟာသက္ကရာဇ်(၁၁၁)ခုနှစ် ၊ဆံတော် ၁-ဆူ၊ တြိယဝင်္ဂမင်း၊သိကြားမင်း၊       အဘခေါက် 

၂။ဒုတိယအကြိမ်–သာသနာသက္ကရာဇ် (၂၁၈/၂၃၈)ခုနှစ်ဆံတော်၆-ဆူ၊ဓါတ်တော်၁၀-ဆူအရှင်ယသသီဟ ဒီပမင်း 

၃။တတိယအကြိမ်–ကောဇာသက္ကရာဇ်(၁၂၀၅)ခု စေတီတော် ပြိုပျက်ပြန်ရာ ၅-နှစ်တိတိ         ပျက်စီးနေ၍ သာသနာသက္ကရာဇ် (၂၃၉၂)ခု၊ကောဇာနှစ်(၁၂၁၀)ခုနှစ် ပြုပြင်၍ (၁၂၁၂)ခုနှစ်တွင်        ပြီးစီးအောင်မြင်သည်။ 

၄။ စတုတ္ထအကြိမ် – သာသနာတော်နှစ် (၂၄၄၁)ခု၊ ကောဇာနှစ်(၁၂၅၉)ခု ပြုပြင် 

၅။ပဉ္စမအကြိမ်–ကောဇာနှစ်(၁၂၇၅)ခုနှစ်တွင်ပုဇွန်တောင်အိုးဖိုရပ်နေမြေပိုင်ရှင်ပွဲစားကြီးဦးစံခို+ ဒေါ်ဒွေး မိသားစုတို့မှ စေတီတော်ကြီးအား သင်တိုင်းစွတ်ငုံ၍ တည်ရာ(၁၂၈၀)ခု၊ တပို့တွဲ တွင် ပြီးစီးရေစက်ချ လှူဒါန်းသည်။ ကုန်ကျငွေ – ( ၁၂၉၈၅၀ )ကျပ် 

၆။(၁၃၂၉)ခု၊ ခရစ်သက္ကရာဇ် (၁၉၆၈)ခု မဟာဆေးဝင်္ကဘာ ဆရာတော်ဘုရားကြီးမှ ထီးတော် အသစ် တင်လှူ ရာတွင် ကုန်ကျငွေ – (၇)သိန်း 

၇။ (၁၉၈၉) ဒီဇင်ဘာ ၂၀-ရက်နေ့တွင် ဘက်စုံဗဟိုအဖွဲ့ကြီး ဖွဲ့စည်းပြီး တည်ဆောက်ပြုပြင်သော        လုပ်ငန်းများအား ဆောင်ရွက်ခဲ့သည်။(၁၉၉၂)ခုနှစ်မှစ၍ ကျန်ရှိသော လုပ်ငန်းများအား ဂေါပက အဖွဲ့မှဆက်လက် ဆောင်ရွက်ခဲ့သည်။(၂၀၁၅)ခုနှစ် ဩဂုတ်လကုန်အထိ ၂၅-နှစ်တာကာလ တည်ဆောက်ပြုပြင်သော လုပ်ငန်းများ၏ တန်ဖိုး (၂၅၂၈၉၄၂၇၅၀/-)ကျပ်