၂၅။ အရှင်သာရိပုတ္တရာနှင့်အရှင်မဟာမောဂ္ဂလာန်တို့၏ ဓါတ်တော်မြတ်များကို သီရိမင်္ဂလာကမ္ဘာအေးစေတီတော်သို့ ပင့်ဆောင်တော်မူလာပုံ

မြတ်စွာဘုရား၏သာသနာတော်တွင် ပညာအရာအထူးချွန်ဆုံး၊ အမြတ်ဆုံး ရဟန္တာအရှင် မြတ်တစ်ပါးနှင့် တန်ခိုးတော်အရာတွင် အထူးချွန်ဆုံး၊ အမြတ်ဆုံး ရဟန္တာအရှင်မြတ်တစ်ပါး ဟူ၍ ရဟန္တာအရှင်မြတ်နှစ်ပါး ပေါ်ထွန်းခဲ့ပါသည်။ ထို ရဟန္တာအရှင်မြတ်နှစ်ပါး သရီရဓါတ်တော်များကို သီရိဓမ္မာ‌သောကမင်းကြီးလက်ထက် အဝန္တိတိုင်း ဥဇ္ဇေနီပြည်(ယခု အိန္ဒိယနိုင်ငံ၊ဘိုပေါလ်ပြည်နယ်) ဝေဒိသာတောင်ရံရှိ သဉ္ဓိစေတီတော်ကြီးတွင် ဌာပနာခဲ့ရာ ၁၈၅၁-ခုနှစ် (မြန်မာသက္ကရာဇ် ၁၂၁၂-ခုနှစ်ခန့်က) စေတီဟောင်းကြီးတူးဖော်ရာမှ ကျောက်‌သေတ္တာကြီး နှစ်လုံးနှင့်အတူတွေ့ရှိခဲ့ပါသည်။ ထိုဓါတ်တော်များကို အင်္ဂလန်သို့ယူဆောင်သွားပြီး လန်ဒန်မြို့တော် ဝိတိုရိယပြတိုက် (Victoria Albert Museum) တွင် ထားရှိခဲ့ပါသည်။ အိန္ဒိယပြည် လွတ်လပ်ရေးရ‌သောအခါ ဓါတ်တော်များကို အင်္ဂလိပ်အစိုးရက အိန္ဒိယနိုင်ငံသို့ ပြန်ပေးခဲ့ပြီး ၁၉၅၁-ခုနှစ် ဇန်နဝါရီလအတွင်း အိန္ဒိယအစိုးရနှင့် မဟာဗောဓိအသင်းကြီးက မြန်မာနိုင်ငံပြည်သူများ ဖူးမြော်ကြည်ညိုရန် ခွဲဝေပေးခဲ့ပြီး အဂ္ဂသာဝက ရဟန္တာ အရှင်မြတ်နှစ်ပါး၏ ဓါတ်တော်များသည် မြန်မာနိုင်ငံသို့ ကြွရောက်တော်မူလာ၍ ဤသီရိမင်္ဂလာ ကမ္ဘာအေးစေတီတော်မြတ်ကြီး ဓါတ်တော်တိုက်တွင် ကိန်းဝပ်စံပယ်လျက်ရှိပါသည်။